Bentley á leið til City?

Samkvæmt heimildum fréttastofu Sky Sports á Manchester City nú í viðræðum við Tottenham um kaup á David Bentley.

Bentley komst nýverið í fréttirnar fyrir ölvunarakstur en af þeim sökum missti hann ökuréttindi sín í eitt ár. Stjóri Tottenham, Harry Redknapp, hefur gagnrýnt hann opinberlega vegna þessa.

Hann hefur lítið komið við sögu í leikjum Tottenham til þessa og aðeins spilað í fimm mínútur í deildinni í haust.

Þetta er ekki í fyrsta sinn sem Bentley er orðaður við City og nú virðist sem svo að hann sé á leið til félagsins, jafnvel þó svo að Mark Hughes, stjóri City, hafi sagt að Joleon Lescott yrðu síðustu kaup sumarsins hjá félaginu.

Tottenham er einnig sagt hafa áhuga á að fá Martin Petrov í sínar raðir en óvíst er hvort að kaupin á Bentley feli í sér að Petrov sé hluti af kaupverðinu.