Króatar gruna Englendinga um græsku

Forseti króatíska knattspyrnusambandsins grunar að Englendingar hafi viljandi valdið Luka Modric meiðslum fyrir landsleik þjóðanna þann 9. september næstkomandi.

Modric leikur með Tottenham og meiddist í leik með liðinu gegn Birmingham nýverið. Hann verður af þeim sökum frá næstu sex vikurnar.

Fyrir átján mánuðum meiddist svo Eduardo illa en hann er á mála hjá Arsenal.

„Fyrst Eduardo og nú Luka Modric," sagði forsetinn, Vlatko Markovic. „Þetta er hræðilegt og velti því fyrir mér hvort þetta hafi virkilega verið óvart."

„Ég er nálægt því að hugsa að þetta hafi verið gert okkur viljandi fyrir landsleikinn við England. Ég sá ætlaði ekki að trúa eigin augum þegar ég sá hvað kom fyrir Luka."

„Hann er mikilvægasti leikmaðurinn í okkar liði og við erum mun veikari án hans. En það er ekkert sem við getum gert í þessu nema að halda haus."