Al Fahim eignast Portsmouth

Portsmouth hefur staðfest að Sulaiman Al Fahim sé orðinn eigandi og stjórnarformaður Portsmouth. Al Fahim er frá Sameinuðu arabísku furstadæmunum og reyndi að kaupa Manchester City á sínum tíma.

Enska knattspyrnusambandið gaf Al Fahim grænt ljós á að kaupa félagið í morgun og gengið var frá málum skömmu síðar. Þetta tryggir Paul Hart áframhaldandi veru sem knattspyrnustjóri liðsins en hann bjargaði Portsmouth frá falli á síðasta tímabili.

Peter Storrie verður áfram framkvæmdastjóri félagsins en með Portsmouth leikur fyrirliði íslenska landsliðsins, Hermann Hreiðarsson.