Anelka: Ég elska Chelsea

Franski vandræðagemsinn Nicolas Anelka virðist loksins vera búinn að finna sér framtíðarheimili. Hann er afar hamingjusamur og segist vera til í að klára ferilinn hjá Chelsea.

Anelka er einhver dýrasti knattspyrnumaður sögunnar enda hefur hann alls skipt átta sinnum um félag og aldrei fyrir neina skiptimynt. Þessi þrítugi framherji segist loksins vera búinn að finna sitt félag.

„Áður en ég kom til Chelsea sagðist ég alltaf vilja spila fyrir stórt félag. Í dag hef ég engan áhuga á því að færa mig um set. Ég er afar hamingjusamur hér og vil spila og skora fyrir þetta félag," sagði Anelka.

„Ég elska Chelsea, elska leikmennina sem ég spila með, elska að spila í Meistaradeildinni og vil endilega vera hér sem lengst. Vonandi gengur það eftir."