Evra: Ef stuðningsmenn okkar púa á Tevez þá púa ég líka

Patrice Evra og Carlos Tevez voru miklir vinir þegar sá síðarnefndi lék með Manchester United og þrátt fyrir að það hafi ekkert breyst utan vallar er franski bakvörðurinn alveg tilbúinn að taka þátt í púinu á Tevez verði Argentínumaðurinn orðinn góður af meiðslunum fyrir Manchester-slaginn á sunnudaginn.

„Ég hef verið að stríða honum á því hvernig móttökur hann muni fá. Ég veit ekki hvort stuðningsmenn okkar munu púa á hann eða klappa fyrir honum. Hann stóð sig frábærlega hjá Manchester United og bar virðingu fyrir treyjunni, Það meta stuðningsmennirnir," segir Evra en bætti svo við:

„Ef stuðningsmenn okkar púa á Tevez þá púa ég líka," sagði Evra örugglega meira í gríni en alvöru í þessu viðtali við breska blaðið Independent.

Patrice Evra og Carlos Tevez mynduðu vinahóp innan Manchester United ásamt Park Ji-sung en þeir þrír eyddu miklum tíma saman utan vallar.

„Ég fékk skilaboð frá honum þar sem hann sagði að þeir myndu vinna leikinn en ég er ekki svo viss um það. Ég vona að hann verði orðinn góður og geti spilað. Það yrði sérstakt að spila á móti honum af því hann er svo góður vinur en hann er leikmaður City og við megum alls ekki leyfa honum að vinna Manchester United," sagði Evra.

„Þessi leikur á móti þeim er sérstakur. Við höfum aldrei mætt þeim áður þegar þeir hafa verið í hópi efstu liðanna. Þeir hafa enn ekki tapað leik svo þeir koma á Old Trafford fullir sjálfstrausts. Þetta verður frábær leikur og alvöru verkefni. Ég vina að við verðum tilbúnir í þetta," sagði Evra.