Skrtel líklega frá í tvær vikur vegna kjálkameiðsla

Varnarmaðurinn Martin Skrtel hjá Liverpool getur ekki leikið með enska félaginu í næstu leikjum vegna meiðsla sem hann hlaut í 2-1 tapinu gegn Tottenham um síðustu helgi þegar hann lenti í samstuði við liðsfélaga sinn Jamie Carragher.

„Samkvæmt læknum ætti Martin að geta spilað aftur eftir tvær vikur og þá verður hann með sérstaka grímu til þess að verja kjálkann. Hann brotnaði ekki en kjálkinn er illa brákaður og því tekur þetta sinn tíma," er haft eftir Karol Csonto umboðsmanni Skrtel í samtali við SITA.

Skrtel missir því að öllu óbreyttu af deildarleikjum Liverpool gegn Stoke og Aston Villa en gæti hugsanlega mætt til leiks aftur gegn Bolton.