Fabregas: Kyssti merkið til að sýna tryggð mína

Spánverjinn Cesc Fabregas átti enn einn stórleikinn fyrir Arsenal í gær þegar hann skoraði eitt mark og lagði upp fjögur mörk í 6-2 sigri Lundúnafélagsins gegn Blackburn á Emirates-leikvanginum.

Fabregas kyssti Arsenal-merkið þegar hann fagnaði marki sínu og útskýrði í leikslok ástæðu sína fyrir því.

„Ég kyssti merkið til þess að sýna tryggð mína við Arsenal og mér fannst þetta vera tilvalinn tími til þess að ítreka ást mína á félaginu. Það fer mjög mikið í taugarnar á mér að lesa orðróma um að ég sé ekki hundrað prósent trúr félaginu og að ég vilji fara aftur til Barcelona.

Þetta er mitt sjöunda tímabil með Arsenal og það er því pirrandi að heyra fólk enn efastu um hvar hjartað mitt er," sagði Fabregas í leikslok í gær.