Portsmouth reynir að fá Zaki

Samkvæmt heimildum Sky Sports fréttastofunnar hefur enska úrvalsdeildarfélagið Portsmouth lagt fram þriggja milljón punda kauptilboð í framherjann Amr Zaki sem nú leikur með Zamalek í heimalandi sínu Egyptalandi.

Zaki sló í gegn á lánstíma sínum hjá Wigan á síðasta keppnistímabili og var í janúarglugganum orðaður við Aston Villa, Liverpool og Real Madrid. Áhuginn á Zaki minnkaði aftur á móti á seinni hluta tímabilsins vegna agavandamála leikmannsins auk þess sem hann skoraði ekki jafn mikið og fyrir áramótin.

Sulaiiman Al Fahim, nýr eigandi Portsmouth, vonast til þess að ná samningum við Zaki og Zamalek fyrir lok félagsskiptagluggans á morgun.