N1 leitar að hugmyndum

N1 hefur hleypt af stokkunum hugmyndasamkeppninni Start09 með því markmiði að hvetja fólk og fyrirtæki til nýrrar sóknar og uppbyggingar. Upphaf hugmyndasamkeppninnar má rekja til hugmyndafundar sem var haldinn í Borgarleikhúsinu í júní.

Allir geta tekið þátt í samkeppninni, sérfræðingar jafnt sem almenningur, börn og fullorðnir. Eina skilyrðið er að hugmyndin snúist um aukna verðmætasköpun á Íslandi. Þátttakendur eru hvattir til að huga vel að framsetningu og myndskreytingu hugmynda sinna. Fullum trúnaði er heitið og er hver hugmynd að sjálfsögðu áfram eign þess sem sendir hana inn.

Glæsileg verðlaun eru í boði, en dómnefnd, sem skipuð verður sérfræðingum á sviði nýsköpunar undir forystu Hermanns Guðmundssonar, forstjóra N1, mun verðlauna þær hugmyndir sem skara fram úr. Þar að auki mun N1 leita leiða til að veita góðum hugmyndum, sem tengjast starfsemi félagsins um allt land, brautargengi.

Nánari upplýsingar um keppnina og innsendingu hugmynda er að finna á www.n1.is/start. Á síðunni er einnig hægt að horfa á fyrirlestrana sem haldnir voru í Borgarleikhúsinu í júní.