Ingimundur: Fylkir er frábær klúbbur

Ingimundur Níels Óskarsson hefur heldur betur slegið í gegn með Fylkismönnum í sumar. Hann kom sínum mönnum á bragðið í kvöld með marki á fyrstu mínútunni, sínu áttunda marki í deildinni.

„Ég er mjög sáttur við að vinna og koma okkur betur fyrir ofarlega í töflunni," sagði Ingimundur í leikslok í Árbænum. Hann segist sáttur við spilamennsku sinna manna þó ýmislegt hefði mátt fara betur. „Við hefðum getað spilað betur. Verið rólegri á boltann og spilað betur en við unnum og þá er maður sáttur. Heilt yfir spiluðum við vel."

Ingimundur er uppalinn Fjölnismaður en kom til Fylkis frá KR þar sem hann fékk ekki nægilega mörg tækifæri. Í Árbænum hefur hann hinsvegar fengið tækifæri og nýtt það ljómandi vel. „Það er frábært að vera hérna, frábær klúbbur að öllu leyti."