Ashley tilkynnir á mánudag hvort hann selji Newcastle eða ekki

Hinn skrautlegi Mike Ashley, eigandi Newcastle, mun samkvæmt breskum fjölmiðlum tilkynna framtíðarplön félagsins á næstkomandi mánudag en hann er búinn að vera að leitast við að selja félagið í meira en ár.

Ashley keypti Newcastle á tæpar 135 milljónir punda árið 2007 og gat sér strax gott orð á meðal stuðningsmanna félagsins fyrir að horfa á leikina úr stúkunni við hlið stuðningsmannanna sjálfra oftar en ekki með bjórglas við höndina.

Auk þess sem hann fékk Newcastle goðsögnina Kevin Keegan til þess að taka við sem knattspyrnustjóri.

Orðspor Ashleys hefur hins vegar farið dvínandi eftir erfitt gengi sem sá félagið falla úr efstu deild á síðusta keppnistímabili og þar að leiðandi snarfalla í verði.

Ashley setti upphaflega um 200 milljón punda verðmiða á félagið en er nú talinn vera tilbúinn að samþykkja kauptilboð upp á 100 milljónir punda.

Newcastle er búið að losa sig við tíu leikmenn í sumar og fá aðeins einn leikmann í staðinn og eftir því sem tíminn líður og stutt í að félgsskiptaglugganum lokar er talið líklegra að Ashley selji félagið ekki strax.

En ef marka má breska fjölmiðla í dag mun ákvörðun eins og segir liggja fyrir á mánudag.