Bamba: Liverpool hefur áhuga á mér

Varnarmaðurinn Souleymane Bamba hjá skoska félaginu Hibernian fullyrðir að enska úrvalsdeildarfélagið Liverpool sé að fylgjast náið með sér.

Liverpool hefur þegar keypt varnarmanninn Glen Johnson í sumar og þá er gríski landsliðsmaðurinn Sotiris Kyrgiakos svo gott sem kominn í raðir félagsins en nafn Bamba hefur ekki verið inni í umræðunni til þessa.

„Umboðsmaður minn hefur tjáð mér að mörg lið séu að fylgjast náið með mér og þar á meðal er Liverpool. Það er náttúrulega mikill heiður að vera orðaður við félag á borð við Liverpool en ég get ekki hugsað of mikið um það fyrr en félagið leggur fram kauptilboð í mig," segir landsliðsmaður Fílabeinsstrandarinnar í viðtali við Daily Record.