Bolton nálægt því að fá Emana

Samkvæmt heimildum Sky Sports fréttastofunnar er enska úrvalsdeildarfélagið Bolton nálægt því að landa miðjumanninum Achille Emana frá Real Betis.

Talið er að Bolton þurfi að reiða fram í kringum 7 milljónir punda fyrir landsliðsmanninn frá Kamerún sem þótti standa sig með prýði á síðusta keppnistímabili í La Liga-deildinni á Spáni þar sem hann skoraði ellefu mörk.

Real Betis gekk aftur á móti erfiðlega og féll niður um deild og fjárhagsstaða félagsins hefur þvi versnað til muna.

„Allir sem þekkja mig vita að ég elska að búa í Sevilla en það er mjög mikilvægt fyrir mig sem landsliðsmann að vera að spila í topp deild. Ákvörðun um framhaldið verður tekin á næstu dögum," segir Emana í samtali við Sky Sports fréttastofuna.