Herbergi Rooney yngri verður í Everton-stíl

Wayne Rooney og kona hans Coleen eiga von á sínu fyrsta barni. Ef það verður strákur, verður herbergið hans innréttað og málað í litum Everton.

Rooney er fæddur og uppalinn í Liverpool og var gallharður Everton-maður í æsku. Hann spilaði síðar með liðinu og var blár í gegn allar götur þangað til hann skipti yfir til Manchester United árið 2004.

Rooney er ekki búinn að gleyma uppruna sínum og vinir hans sögðu Daily Mail að ef fyrsta barn þeirra hjóna verður strákur, verði herbergið hans dekkað í litum Everton.

Rooney sjálfur varð að láta sér nægja veggspjald af hetjunni sinni Duncan Ferguson þegar hann var ungur, en líklega fær sonur hans eitthvað meira dót á sína veggi þegar að því kemur.

Þessi áform verða hinsvegar lögð á hilluna ef hjónin eignast stúlku ef marka má frétt Daily Mail, en þá mun bleiki liturinn verða allsráðandi í herbergi krílisins.