Ljungberg aftur til Arsenal?

Samkvæmt enskum fjölmiðlum gæti verið að Freddie Ljungberg sé aftur á leið í enska boltann og þá til síns gamla félags, Arsenal.

Ljungberg mun funda með Arsene Wenger, stjóra Arsenal, í vikunni til að ræða mögulegan lánssamning en hann er nú á mála hjá Seattle Sounders í bandarísku MLS-deildinni.

Ljungberg er með svipaðan lánssamning og David Beckham gerði við AC Milan á síðasta tímabili í huga.

Wenger og Ljungberg munu hafa verið í góðu sambandi síðan sá síðarnefndi fór til West Ham fyrir tveimur árum síðan. Ljungberg lék á sínum tíma 216 leiki fyrir Arsenal en náði sér ekki á strik hjá West Ham vegna meiðsla.

Ljungberg fór í aðgerð á mjöðm í Bandaríkjunum og er nú verkjalaus.