Kristján: Þurfum að spila betur í fleiri en einn leik í röð

Kristján Örn Sigurðsson var að vonum ánægður með spilamennsku Íslands gegn Noregi í kvöld en að sama skapi svekktur að sigra ekki leikinn.

"Ég held að við getum verið sáttir við okkar leik í dag. Mér fannst við byrja pínu varkárir og þeir hættulegir fyrstu 10 mínúturnar eða korterið. Svo er eins og við gerðum okkur grein fyrir því að ef við værum á fullu værum við betra liðið og þá snýst leikurinn og við vorum með yfirhöndina það sem eftir var," sagði Kristján fljótlega eftir að flautað var til leiksloka í kvöld.

"Við hefðum getað fengið meira út úr þessum leik. Okkur gekk mjög vel að halda boltanum innan liðsins og þá fáum við sjálfstraust inn í liðið og náum að sækja og fáum margar fínar sóknir, eins og í markinu sem kom eftir fína sókn. Við fengum margar aðrar fínar sóknir og hefðum getað skorað meira."

"Við spiluðum vel varnarlega og það var allt liðið, það er ekki nóg að fjórir í vörninni hugsi um vörnina. Það þurfa allir ellefu í liðinu að verjast og þá getur gengið vel."

John Carew lét sig tvívegis falla í vítateig Íslands í von um að krækja í vítaspyrnu í baráttu við Kristján og félaga í vörninni. "Seinna skiptið var einhver vitleysa í honum en í fyrra skiptið dettum við um hvorn annan. Ég var ekki að reyna að fara í hann og hefði orðið mjög fúll ef hann hefði dæmt víti á það. Við dettum um hvorn annan," sagði Kristján sem var ekki sáttur við niðurstöðu Íslands í riðlinu, fimm stig.

"Stigafjöldinn er allt of lágur. Við getum pikkað ýmislegt út úr keppninni. Það er nokkrir leikir þar sem við spilum ágætlega en það sem er ekki nógu gott að við getum ekki spilað vel í fleiri en einn leik í röð, það hefur verið vandamál hjá okkur lengi eins og stöngin á móti Norðmönnum, hún var ekki að hjálpa okkur," sagði Kristján að lokum.