Sullivan ætlar ekki að kaupa West Ham

David Sullivan, einn fráfarandi eiganda enska úrvalsdeildarfélagsins Birmingham, segir í samtali við Frétttastofu BBC að hann ætli sér ekki að kaupa West Ham á næstunni.

Það er eignarhaldsfélagið CB Holding sem á West Ham en það er í eigu Straums sem er nú í greiðslustöðvun. Áður átti Björgólfur Guðmundsson félagið.

Samkvæmt fréttum í enskum fjölmiðlum undanfarnar vikur er söluverð West Ham sagt vera frá 100-120 milljónir punda. Félagið er hins vegar skuldum hlaðið og fengi því bankinn íslenski aðeins lítinn hluta af kaupverðinu í sinn hlut.

„Það er mjög ólíklegt, ég þarf á fríi að halda," sagði Sullivan spurður hvort hann ætlaði að kaupa West Ham. „Eftir það mun ég skoða hvaða kostir standa mér til boða en það er ekkert útilokað."

Sullivan seldi sinn hlut í Birmingham til Carson Yeung sem mun eignast félagið formlega í næstu viku.