Hótel Manchester United sprengt upp - hætt við að fara til Indónesíu

Manchester United er hætt við að fara til Indónesíu í Asíuferð sinni eftir sprengjuárás á hótelið sem leikmenn enska úrvalsdeildarliðsins áttu að gista á í Jakarta. United var búið að panta fjölda herbergja á Ritz-Carlton hótelinu aðfaranótt sunnudags og mánudags.

Manchester United hefur jafnframt tjáð Knattspyrnusambandi Indónesíu að liðið geti ekki spilað fyrirhugaðan æfingaleik á móti Stjörnuliði Indónesíu sem átti að vera á mánudaginn.

„Við verðum að hugsa um öryggi leikmanna og starfsmanna okkar því þeir skipta okkur öllu máli," sagði David Gill, framkvæmdastjóri Manchester United

United kom til Kuala Lumpur í Malasíu í morgun og það er líklegast að leikmenn liðsins verði lengur þar en þó er ekkert enn ákveðið enda eru forráðamenn United að vinna í sínum skipulagsmálum eftir þessi sérstæðu atburði.