Skattar: BHM hefur áhyggjur af meðalmanninum

BHM lýsir áhyggjum af kjaraþróun fólks með meðalháar tekjur í yfirstandandi kjaraskerðingum og fyrirhugðum skattkerfisbreytingum, sem og breytingum á vaxta- og barnabótakerfunum. Í yfirlýsingu frá félaginu segir að mikilvægt sé að huga að jaðaráhrifum skattbreytinga og tekjutenginga.

BHM telur eðlilegt á aðhaldstímum að sérkjör einstakra hópa hvað varðar skattlagningu séu endurskoðuð og jafnræðis þannig gætt. BHM styður þannig hækkun fjármagnstekjuskatts og leggur til að skattmeðferð fyrirtækja verði breytt á þann hátt að miðað verði við meðaltalsprósentu hjá OECD ríkjum, en hún er 26,6 prósent á móti 15 prósentum hér á landi.

Ennfremur hvetur BHM til þess að innheimta skatta verði efld og ráðist verði gegn tvöföldu skattkerfi sem viðgengst í landinu í tengslum við einkahlutafélög.