Óli Þórðar: Fjalar á heima í landsliðinu

Ólafur Þórðarson segir að Fjalar Þorgeirsson eigi vel heima í íslenska landsliðinu í knattspyrnu. Fjalar átti góðan leik þegar Fylkir sigraði Fram fyrr í kvöld.

„Þú verður að spyrja landsliðsþjálfarann að því. Hann heitir Óli Jó, ekki Óli Þórðar," sagði Ólafur Þórðarson aðspurður hvort Fjalar Þorgeirsson væri ekki farinn að banka á dyr íslenska landsliðsins.

Fjalar átti frábæran leik í kvöld og bjargaði Fylkismönnum oft á tíðum, að undanskilinni einni skógarferð sem varð til þess að Framarar skoruðu. Ólafi finnst Fjalar eiga heima í landsliðinu. „Mér finnst hann eiga heima þar. Hann er klárlega einn besti markmaðurinn á landinu."