Stoke ekki búið að gefast upp á að fá Collins

Knattspyrnustjórinn Tony Pulis hjá Stoke bindur enn vonir við að fá varnarmanninn James Collins frá West Ham en félögin eru búin að koma sér saman um kaupverð upp á 5 milljónir punda.

Leikmaðurinn hefur aftur á móti ekki samþykkt samningstilboð frá Stoke og því talið að ekkert yrði af félagsskiptunum. Pulis er þó ekki tilbúinn að afskrifa Collins.

„Það ber enn smá á milli í samningaviðræðunum en ég er ekki búinn að gefa þetta upp á bátinn. Collins er leikmaður sem ég hef miklar mætur á og það væri óskandi að við gætum náð samningum fyrir lok félagsskiptagluggans. Það eru enn góðar líkur á því að það gerist," segir Pulis í viðtali við The Sentinel.

Collins lék með West Ham gegn Wolves í fyrstu umferðinni en knattspyrnustjórinn Gianfranco Zola hjá West Ham telur sig greinilega geta misst Collins þar sem hann á nógu marga aðra valkosti varnarlega en þarf nauðsynlega að losa peninga til þess að styrkja framlínu félagsins.