Anelka afskrifar Arsenal og Liverpool úr titilbaráttunni

Framherjinn Nicolas Anelka hjá Chelsea telur Lundúnafélagið vera líklegast til þess að landa meistaratitlinum í ensku úrvalsdeildinni á nýhafinni leiktíð og að Englandsmeistarar Manchester United séu helsta ógnin þrátt fyrir að þeir hafi misst sinn besta leikmann í Cristiano Ronaldo.

Anelka hefur hins vegar ekki trú á því að Arsenal og Liverpool geti blandað sér í baráttuna.

„Chelsea er líklegast til þess að vinna og United þar á eftir. Ekki láta það blekkja ykkur þó svo að United hafi misst sinn besta leikmann því félagið er enn gríðarlega sterkt. Við erum samt sannfærðir um að United muni ekki vinna sinn fjórða titil í röð.

Við höfum nú nýjan knattspyrnustjóra sem er fæddur sigurvegari og ég hef trú á því að það muni hjálpa okkur að taka þá titla sem í boði eru.

Arsenal og Liverpool eru vel mönnum lið en ég hef ekki trú á því að þau verði með í baráttunni þegar fimm umferðir eru eftir af deildinni. Þá verða það bara Chelsea og United sem munu berjast," segir Anelka í viðtali við The Sun.