Róleg umferð enn sem komið er

Umferð út úr bænum hefur verið róleg það sem af er degi, samkvæmt upplýsingum frá umferðardeild lögreglunnar á höfuðborgarsvæðinu. „En það var þónokkuð mikil umferð í gærkvöldi. Það er greinilegt að helgarumferðin byrjaði í gær," segir Kristófer Sæmundsson, varðstjóri í umferðardeild, í samtali við fréttastofu. Hann sagði erfitt að átta sig á því hvort umferðin hefði frekar verið um Suðurlandsveg eða Vesturlandsveg. Líklegast hefði það verið svipað. Kristófer býst við því að umferðin muni aukast þegar líður á daginn.