Dunne sár út í City

Richard Dunne segist ekki ánægður með framkomu forráðamanna Manchester City við sig en hann var á dögunum seldur til Aston Villa.

Dunne var á mála hjá City í níu ár og var fyrirliði félagsins þar til hann fór. Hann sagði í samtali við enska fjölmiðla að honum hafi verið skipað að fara eftir að félagið keypti bæði Kolo Toure og Joleon Lescott.

„Þeir keyptu leikmenn og þar með var málið útrætt. Ég fékk ekki tækifæri á að vera áfram í liðinu og berjast fyrir míinu sæti. Það fór í taugarnar á mér."

„Mér var sagt að ég yrði að fara og það líkaði mér ekki. Þeir sögðu mér að þeir höfðu tekið tilboði í mig en ég sagði „hvað ef ég vil vera áfram félaginu?" Þeir sögðu að þeir þyrftu á peningunum að halda."

„En ég er ekki bitur. Ég naut mín hjá félaginu og óska þeim alls hins besta. Stuðningsmennirnir hafa reynst mér mjög vel og þeir þrá að liðið nái árangri."