Myhill framlengir við Hull

Markvörðurinn Boaz Myhill hefur framlengt samning sinn við enska úrvalsdeildarfélagið Hull City til loka tímabilsins 2012.

Myhill var á mála hjá Aston Villa á sínum tíma og var til að mynda lánaður til fimm félaga á tveggja ára tímabili. Hann gekk svo til liðs við Hull fyrir 50 þúsund pund árið 2003 er liðið lék í ensku D-deildinni.

Síðan þá hafa bæði Myhill og félagið tekið stórstigum framförum og Myhill hefur meðal annars unnið sér sæti í landsliði Wales.

„Ég hef séð á undanförnum tveimur eða þremur árum að Boaz Myhill er nægilega góður til að spila í ensku úrvalsdeildinni," sagði Phil Brown í samtali við heimasíðu Hull. Myhill þurfti að sætta sig við að sitja á bekknum í nokkrum leikjum á síðasta tímabili er Matt Duke vann sér sæti hans í byrjunarliðinu.

„Hann lenti í vandræðum á síðasta tímabili en sneri aftur í byrjunarliðið og var öflugri fyrir vikið. Ég er mjög ánægður með að Bo skuli hafa gert nýjan langtímasamning við félagið."