Stærstu félög heims á eftir Bendtner

Faðir Nicklas Bendtner segir að öll stærstu félög heims hafi verið á höttunum eftir syni sínum áður en hann ákvað að framlengja samninginn sinn við Arsenal.

Thomas Bendtner er einnig umboðsmaður Nicklas og segir að það hefði verið lítið mál fyrir son sinn að skipta um lið í sumar. Hann hefur áður verið orðaður við Barcelona, Inter Milan og Bayern München í sumar.

Bendtner kom alls við sögu í 50 leikjum með Arsenal á síðasta tímabili og skoraði í þeim fimmtán mörk. Búist er við því að Bendtner fái enn meira að spila í vetur nú þegar að Emmanuel Adebayor er farinn til Manchester City.

Bendtner skrifaði undir nýjan langtímasamning við Arsenal í gær. „Það var aldrei neinn vafi á því að hann vildi vera áfram hjá Arsenal. Hann er afar ánægður með nýja samninginn og mestu skiptir að Arsene Wenger hefur mikla trú á honum."