Rooney: Ég svindla ekki

Wayne Rooney segir það alls ekki rétt að hann hafi verið með leikaraskap þegar hann fékk víti í leik Manchester United og Arsenal í ensku úrvalsdeildinni um síðustu helgi.

Leikaraskapur hefur mikið verið í umræðunni í Englandi eftir að Eduardo, leikmaður Arsenal, fékk tveggja leikja bann hjá Knattspyrnusambandi Evrópu fyrir að blekkja dómarann í leik Arsenal og Celtic í forkeppni Meistaradeildarinnar.

„Allir sem fylgjast með mér vita að ég er heiðarlegur leikmaður," sagði hann í samtali við enska fjölmiðla. „Ef dómarinn dæmir víti þá getur maður sjálfur ekkert gert í því. Ef þeir vilja ná fram refsingu er það undir UEFA og þeim sem stjórna íþróttinni komið. Leikmenn vilja bara spila."

„Englendingar hafa alltaf haft það orð á sér að vera heiðarlegir. Það er mikilvægt að leggja sig fram og reyna að spila heiðarlega. Annað er ekki sanngjarnt gagnvart andstæðingnum eða áhorfendum."