Ferguson er góður leikmaður

Alex McLeish, stjóri Birmingham, hafnar þeim staðhæfingum að Barry Ferguson hafi mistekist að sanna sig í ensku úrvalsdeildnini þegar hann var á mála hjá Blackburn á sínum tíma.

Ferguson kom til Blackburn frá Glasgow Rangers í Skotlandi árið 2003 fyrir 7,5 milljónir punda. Hann náði aðeins að koma við sögu í 35 leikjum fyrir félagið og var aftur seldur til Rangers fyrir 4,5 milljónir punda í janúar árið 2005.

„Ég er ekki sammála þeim sem segja að Barry hafi átt erfitt uppdráttar hjá Blackburn," sagði McLeish í samtali við enska fjölmiðla. „Hann varð fyrir mjög slæmum hnémeiðslum en þegar hann náði sér af þeim stóð hann sig mjög vel á miðjunni hjá Blackburn."

„Hann hefur því ekki enn fengið að sanna sig í ensku úrvalsdeildinni því hann var ekki nógu lengi hjá Blackburn."

Ferguson er nú kominn á ný í ensku úrvalsdeildinni þar sem hann leikur undir stjórn McLeish hjá Birmingham.

„Hann hefur komið sér afar vel fyrir hjá félaginu og ég veit að þegar hann kemst í sitt besta form verður hann okkur afar dýrmætur."