Gangstéttarhellan sem rotaði lögreglumanninn var 3,5 kíló

Stefán Eiríksson lögreglustjóri segir ekki standa til að taka harðar á mótmælendum eftir atburði gærdagsins. Lögreglan meti aðstæður hverju sinni og hingað til hafi hún sýnt þolinmæði. Breyting hafi hinsvegar orðið á því í gær. Lögregluþjónn rotaðist eftir að hafa fengið steinhnullung sem vó 3,5 kg í höfuðið. Áður hafði hann fengið 3 til 4 hnullunga í sig. Stefán segir að tekið verði á grjótkösturunum af fullri hörku.

„Við höfum ekki gripið til aðgerða hingað til nema það hafi verið lífsnauðsynlegt, hvort heldur sé með piparúða, kylfur og svo táragas í gærkvöldi," segir Stefán og bendir á að í nótt þegar gasinu var sleppt hafi lögreglan staðið frammi fyrir alvarlegum aðsúg sem gerður var að lögreglu fyrirvaralaust.

„Það rigndi grjóti yfir lögreglumenn, stórum hnullungum, múrsteinum og ýmsu öðru. Þar slösuðust tveir alvarlega og á sama tíma var stórt bál kveikt fyrir framan þinghúsið og bensíni var skvett á aðaldyrnar og reynt að kveikja í. Okkar mat var að nauðsynlegt væri að tryggja að ekki yrði kveikt í og að mótmælendur eða lögregla myndu slasast alvarlega. Því ákváðum við að brjóta upp þennan hóp," segir Stefán.

Hann segir ágætlega hafa gengið að rýma Austurvöll og þá hafi lögreglumenn einnig farið og reynt að verja Stjórnarráðið en þar voru rúður brotnar og skemmdir unnar.

„Það þarf mikinn ásetning og einbeitann brotavilja til þess að kasta hnullungi sem er 3,5 kíló af fullu afli," segir Stefán en það var þyngdin á hnullungnum sem rotaði einn lögreglumann sem missti meðvitund við höggið.

Hann segir alla lögreglumennina hafa orðið fyrir grjótkasti. Enginn var hinsvegar handtekinn í gær en Stefán segir að lögreglan eigi töluvert af myndefni frá atburðunum úr öryggismyndavélum. „Þar sjást hverjir það eru sem eru að kasta grjóti og við munum fara vel og vandlega yfir það. Því verður síðan fylgt eftir af fullri hörku."