Bjarni Jóhannssson: Við áttum að vinna hérna í dag

Bjarni Jóhannsson, þjálfari Stjörnunnar, var eins og aðrir í Stjörnuliðinu mjög svekktur eftir 3-3 jafntefli á móti Vals á Hlíðarenda í dag. Stjörnumenn voru miklu betri í seinni hálfleik en fengu á sig ódýra vítaspyrnu í lok leiksins.

„Við áttum að vinna hérna í dag en æðri völd tóku í taumana," sagði Bjarni og vísaði þá til vítaspyrnudómsins þar sem Valsmenn skoruðu jöfnunarmark sitt á 88. mínútu leiksins.

"Hann vildi meina að þetta hafi verið gróft tog en ég sá það aldrei. Malli fann ekki fyrir því þannig að ég veit ekki hvað svona mönnum gengur til. Gunnar Jarl er annars frábær dómari sem hefur komið með flotta línu inn í úrvalsdeildina. Ég hrósa honum fyrir það en þetta var ekki sanngjarnt," sagði Bjarni.

„Við vorum tætingslegir í fyrri hálfleik og við eigum að nýta það betur þegar við fáum mark svona snemma í leiknum. Það kom værukærð og slen yfir liðið þegar við komust yfir. Seinni hálfleikurinn var aftur á móti mjög vel leikinn af okkar hálfu. Gamli fyrriparts-sumars taktar rifjuðust upp. Við veðjuðum á sóknarleikinn, gerðum breytingar í hálfleik og það kom mikið fastara skipulag á liðið," sagði Bjarni.

Bjarni fagnaði endurkomu tveggja manna í liðið. Þorvaldur Árnason skoraði sín fyrstu mörk í Pepsi-deildinni og Steinþór Freyr Þorsteinsson kom inn í byrjunarliðið eftir langa fjarveru vegna meiðsla.

„Við sjáum það að Steinþór og Valli (Þorvaldur Árnason) setja annan brag á liðið eins og var á því í vor," sagði Bjarni og hrósaði sérstaklega Þorvaldi. „Þetta var vel gert hjá Valla og hann er mikilvægur hlekkur í liðinu okkar. Það er synd að hann skuli hafa verið svona mikið meiddur í sumar," segir Bjarni.

„Það var frábært að við skyldum ekki þurfa nema hálft mót til þess að halda sætinu okkar. Við verðum bara að bíða betri tíma eftir fræknum útisigrum og það kannski mörgum í röð," sagði Bjarni að lokum en þetta hefði orðið fyrsti útisigur Stjörnunnar síðan 14. maí þegar liðið vann 6-1 sigur á Þrótti.