Wenger vill aldrei hætta að þjálfa

Arsene Wenger, stjóri Arsenal, hefur greint frá því að hann stefni á að vinna alla sína ævi. Wenger, sem hefur þjálfað Arsenal lengur en nokkur annar maður, verður 60 ára á fimmtudag.

Þrátt fyrir það er Wenger ekki á þeim skónum að slaka á og setjast í helgan stein.

„Ég hef heilsuna og ég vil vinna á meðan ég er á lífi en auðvitað verð ég aðlaga mig að aðstæðum. Menn eins og Trapattoni, sem er sjötugur, hafa sýnt að það er hægt að endast lengi í þessu starfi," sagði Wenger.

„Ég veit ekki hvað ég verð lengi í þessu starfi. Eins og staðan er í dag þarf ég að endurmeta stöðuna á tveggja ára fresti."

Wenger hefur verið við stjórnvölinn hjá Arsenal síðan 1996.