Eigendur Birmingham að selja - vilja kaupa West Ham

Sögusagnir í breskum fjölmiðlum herma að viðskiptajöfurinn Carson Yeung frá Hong Kong hafi lagt fram 81,5 milljón punda kauptilboð í enska úrvalsdeildarfélagið Birmingham og að stærstu hluthafarnir David Sullivan og David Gold séu að hugsa um að selja.

Sullivan og Gold hafa lengi verið orðaðir við West Ham og áttu reyndar um tíma 30 prósent hluta í félaginu og voru til að mynda meðal annars með í baráttunni þegar Björgólfur Guðmundsson keypti Lundúnafélagið á sínum tíma.

West Ham er nú undir stjórn eignarhaldsfélagsins CB Holdings eftir að Björgólfur fór á hausinn og missti félagið frá sér fyrr í sumar og hefur félagið verið á sölulist síðan þá.

Talið er að verðmiðinn á West Ham sé í kringum 120 milljónir punda en Sullivan og Gold eru hins vegar ekki taldir vera tilbúnir að borga svo mikið. Hvort af þessum viðskiptum verði ræðst væntanlega á næstu vikum.