Benitez: Kominn tími á að Babel sýni hvað hann getur

Knattspyrnustjórinn Rafa Benitez hjá Liverpool segir að Hollendingurinn Ryan Babel þurfi að fara að láta til sín taka eða að framtíð hans hjá félaginu sé í hættu.

Babel hefur ekki beinlínis slegið í gegn á Anfield síðan hann var keyptur til Liverpool á 11,5 milljónir punda frá Ajax árið 2007 og Benitez vonast nú til þess að Hollendingurinn taki sér tak og nýti þau tækifæri sem hann fær með liðinu.

„Ryan veit að hann þarf að sanna sig almennilega fyrir okkur og hann fær tækifæri til þess. Það er kominn tími á að hann sýni hvað hann getur," sagði Benitez á blaðamannafundi í dag.