Alves farinn til Katar

Afonso Alves, Brasilíumaðurinn sem er dýrasti leikmaðurinn í sögu Middlesbrough, er farinn frá félaginu og genginn til liðs við félag í Katar.

Alves var keyptur til Boro í janúar í fyrra frá hollenska félaginu Heerenveen fyrir tólf milljónir punda.

Hann byrjaði vel hjá sínu nýja félagi og skoraði til að mynda tvö mörk í leik gegn Manchester Untied og þrennu gegn Manchester City.

En á síðustu leiktíð átti hann mjög erfitt uppdráttar. Hann skoraði fjögur mörk allt tímabilið sem lauk með því að Boro féll úr ensku úrvalsdeildinni.

Í sumar sagðist hann svo vilja fara frá félaginu og mætti ekki á tilskyldum tíma þegar undirbúningstímabilið hófst. Hann lét þó sjá sig á endanum en hefur ekki komið við sögu hjá liðinu í ensku B-deildinni í haust.

Alves hefur nú gert þriggja ára samning við Al Sadd sem greiddi um sex milljónir punda fyrir kappann.

Þrír aðrir sterkir leikmenn hafa yfirgefið Boro í sumar. Það eru Stewart Downing, Tuncay Sanli og Robert Huth.