Kuyt: Liverpool getur enn orðið meistari

Framherjinn Dirk Kuyt er hvergi banginn þrátt fyrir að byrjun Liverpool í upphafi tímabilsins í ensku úrvalsdeildinni hafi verið talsvert undir væntingum en hefur unnið tvo leiki og tapað tveimur eftir fjórar umferðir.

„Því verður ekki neitað að þetta var ekki sú byrjun á tímabilinu sem við höfðum ætlað okkur, þvert á móti. En ég er engu að síður sannfærður um að við séum komnir á beinu brautina og í sigurleiknum á móti Bolton hafi átt sér stað margt jákvætt sem við eigum eftir að taka með okkur í næstu leiki.

Ég hef enn fulla trú á því að Liverpool geti orðið meistari á þessu tímabili. Við þurfum bara að einbeita okkur að okkur sjálfum og hugsa um næsta leik," segir Kuyt í samtali við Sky Sports fréttastofuna.