Arsenal hefur áfrýjað tveggja leikja banni Eduardo

Forráðamenn Arsenal hafa ekki farið leynt með að ákvörðun aganefndar UEFA um að dæma framherjann Eduardo Da Silva í tveggja leikja bann fyrir leikaraskap hafi valdið sér vonbrigðum og knattspyrnustjórinn Arsene Wenger fer þar fremstur í flokki.

Umrætt atvik átti sér stað í leik Arsenal og Celtic í undankeppni Meistaradeildarinnar en Eduardo fiskaði víti með því að láta sig falla í vítateig Celtic og Arsenal skoraði upp úr því fyrsta mark leiksins. Arsenal hefur nú áfrýjað dómi UEFA.

„Við teljum að sú ákvörðun að dæma Eduardo í bann sé ekki vel ígrunduð og þess vegna höfum við áfrýjað dómnum. Ef bannið stendur mun það keyra allt um koll og UEFA setur sig í erfiða stöðu upp á framhaldið að gera," segir í yfirlýsingu á opinberri heimasíðu Arsenal.