Viduka hugsanlega á leið til West Ham

Ástralinn Mark Viduka gæti verið á leið til West Ham en framherjinn er fáanlegur á frjálsri sölu þar sem samningur hans við Newcastle rann út fyrr í sumar.

Þar sem Viduka var ekki samningsbundinn þegar félagsskiptaglugganum lokaði 1. september getur hann gengið nú þegar í raðir West Ham.

„Gianluca Nani, yfirmaður knattspyrnumála, hefur ásamt knattspyrnustjóranum Gianfranco Zola verið í viðræðum við framherja sem er samningslaus. Samningarviðræðurnar hafa staðið yfir í rúman mánuð," segir í yfirlýsingu á heimasíðu West Ham.

Þrátt fyrir að nafn Viduka komi hvergi fram á heimasíðu Lundúnufélagsins staðhæfir Daily Mail að það sé í raun Ástralinn sem um sé rætt.