Capello hefur kennt Cole stundvísi

Framherjinn Carlton Cole hjá West Ham hefur fengið að kenna á heraga þeim sem landsliðsþjálfarinn Fabio Capello heldur uppi þegar enska landsliðið hittist en Ítalinn er þekktur fyrir að vilja hafa hlutina á hreinu.

Cole viðurkennir að hann hafi þurft að taka sér tak og sé nú miklu stundvísari en hann var áður.

„Fabio þolir ekki að menn komi of seint og ef það gerist þá fá þeir að finna vel fyrir því. Ég get staðfest það en vill ekki fara nánar ofan í það hver refsingin var. Það er bara á milli mín og annarra leikmanna landsliðsins," segir Cole sem afrekaði það meðal annars á sínum tíma sem leikmaður Chelsea að mæta of seint í leik hjá Lundúnafélaginu.

Framherjinn afslappaði mætti reyndar ekki bara seint, heldur mjög seint því hann kom ekki á svæðið fyrr en í hálfleik.