Donovan með svínaflensu

Bandaríski knattspyrnukappinn Landon Donovan hefur greinst með svínaflensu og er talið að hann hafi smitast af tveimur starfsmönnum LA Galaxy.

Starfsmennirnir tveir veiktust þegar þeir ferðuðust með liðinu til Massachusetts þar sem LA Galaxy spilaði gegn New England Revolution. Skömmu síðar byrjaði Donovan að finna fyrir einkennum.

Á miðvikudaginn spilaði svo Donovan með bandaríska landsliðinu sem tapaði fyrir Mexíkó, 2-1, í undankeppni HM. Donovan flaug strax eftir leik til Los Angeles.

„Þegar ég vaknaði í morgun var ég með brennandi hita. Ég mældist með 38,2 stiga hita," sagði hann í samtali við bandaríska fjölmiðla. Síðar fékk hann staðfest hjá lækni að hann væri með svínaflensuna.

Sem kunnugt er leikur David Beckham með LA Galaxy en hann var staddur í Hollandi í vikunni þar sem hann lék með enska landsliðinu.