Evans fer líklega í aðgerð þegar Ferdinand snýr aftur

Varnarmaðurinn Jonny Evans hjá Englandsmeisturum Manchester United er meiddur á kálfa og þarf á aðgerð að halda til þess að fá bót meina sinna en hefur spilað í gegnum sársaukann vegna meiðsla Nemanja Vidic og Rio Ferdinand.

Vidic er nú kominn aftur í liðið og Ferdinand verður væntanlega leikfær bráðlega. Svo gæti reyndar farið að Evans bíði með aðgerðina þangað til eftir landsleiki með Norður-Írum í september en landsliðsþjálfarinn Nigel Worthington segir ákvörðunina algjörlega vera í höndum Evans.

„Heilsa leikmannsins er það sem skiptir mestu máli og þó svo að Jonny hafi hringt í mig og tjáð mér að hann vilji spila þessa landsleiki þá er ég ekki að pressa neitt á hann. Ég vill ekki lenda í deildum við Sir Alex [Ferguson, knattspyrnustjóra United]. Hvað sem verður þá tekur Jonny ákvörðunina um hvort hann fari í aðgerð strax eða bíði þangað til eftir landsleikina," segir Worthington.