Zola vill fá annan framherja til West Ham

Knattspyrnustjórinn Gianfranco Zola hjá West Ham er afar ánægður með að félagið hafi náð að kaupa framherjann Alessandro Diamanti frá Livorno en ítrekar jafnframt að hann vilji kaupa einn annan framherja til viðbótar áður en félagsskiptaglugganum lokar 1. september.

„Diamanti er mjög góður leikmaður sem á eftir að nýtast okkur mjög vel en ég er ekki enn búinn að ákveða hvar ég mun láta hann spila. Hann er framherji með góðan vinstri fót og getur hugsanlega líka spilað á vinstri kantinum. Við sjáum til hvernig hann smellur inn í liðið.

Það breytir því ekki að við erum enn að leita að framherja og vonandi gerist eitthvað í þeim málum sem fyrst," segir Zola en Marouane Chamakh hjá Bordeax og Eiður Smári Guðjohnsen hjá Barcelona hafa sterklega verið orðaðir við Lundúnafélagið á síðustu dögum.