Everton búið að ganga frá kaupum á Distin

Varnarmaðurinn Sylvain Distin er formlega genginn í raðir Everton frá Portsmouth eftir að hafa gengist undir læknisskoðun á Goodison Park í morgun.

Kaupverðið er ekki gefið upp en hinn 31 árs gamli leikmaður skrifaði undir þriggja ára samning við Liverpool-borgar félagið.

Knattspyrnustjórinn David Moyes hjá Everton er afar ánægður með kaupin.

„Við þurfum sannarlega á varnarmanni að halda, jafnvel áður en Lescott var seldur, þannig að við erum hæst ánægðir með að fá Distin. Hann er talsvert eldri en Lescott en ég man vel hvað David Weir og Alan Stubbs stóðu sig vel fyrir okkur þegar þeir voru eldri en þrítugir og ég vona að Distin geti gert það sama," segir Moyes í viðtali við opinbera heimasíðu Everton.