Umfjöllun: Blikasigur gegn slökum Keflvíkingum

Breiðablik vann verðskuldaðan 3-0 sigur á Keflvíkingum suður með sjó í kvöld. Þeir þoka sér því aðeins lengra frá fallsætunum og hafa nú unnið tvo leiki í röð. Keflvíkingar töpuðu hins vegar sínum öðrum leik í röð og falla niður í 5.sætið.

Fyrri hálfleikur var fremur tíðindalítill í kvöld. Það virtist áberandi hversu mikið heimamenn söknuðu Símun Samúelsen, sem var í leikbanni, en sóknarleikur þeirra var afar rislítill í hálfleiknum.

 

Blikar spiluðu hins vegar ágætlega, héldu boltanum oft vel sín á milli og Arnar Grétarsson hafði tökin á miðjunni. Á 17.mínútu kom Kristinn Steindórsson þeim yfir með marki af markteig eftir góða sendingu frá Árna Kristni Gunnarssyni. Varnarleikur Keflvíkinga var ekki upp á marga fiska í þessu tilviki og Ómar Jóhannsson var frosinn á línunni.

Eftir þetta gerðist lítið markvert í fyrri hálfleiknum. Breiðablik var þó nær því að bæta við marki þegar Arnar Grétarsson var sloppinn í gegn en Ómar sá við honum í markinu. Hættulegasta færi heimamanna skapaði Magnús Þorsteinsson upp á eigin spýtur, en hann var hins vegar alltof lengi að athafna sig og færið rann út í sandinn.

Síðari hálfleikur hófst með miklu fjöri því strax á 51.mínútu fengu Keflvíkingar vítaspyrnu þegar Jón Gunnar Eysteinsson féll í teignum eftir baráttu við bakvörðinn Árna Kristin. Þorvaldur dómari var ekki í nokkrum vafa þegar hann benti á punktinn en Magnús Sverrir Þorsteinsson skaut hins vegar hátt yfir úr spyrnunni og mistókst því að jafna leikinn fyrir heimamenn.

Það var svo ekki nema um tíu mínútum seinna að áðurnefndur Árni Kristinn, sem átti mjög góðan leik fyrir Blika í kvöld, kom Blikum í 2-0 með ansi skondnu marki. Hann stóð þá langt úti á hægri kanti, sendi boltann í átt að marki og þó svo að líklega hafi verið um sendingu að ræða endaði boltinn í fjærhorninu og Blikar því komnir í 2-0. Árni sagði reyndar í spjalli við blaðamann að leik loknum að hann hafi ætlað sér að skjóta og benti á sér til stuðnings nánast eins mark sem hann skoraði fyrir nokkrum árum síðan í leik gegn KA.

Eftir mark Árna ógnuðu Keflvíkingar í tvígang marki Breiðabliks án þess þó að skora. Leikur þeirra var alls ekki nógu góður og litlar framfarir að merkja frá því í leiknum gegn Fram sem tapaðist 5-0. Sóknarleikur þeirra var afar bitlaus og Breiðablik með öll tök á miðjunni, auk þess sem varnarmenn Keflavíkur voru að gera sjaldséð mistök í sínum leik.

Blikar bættu hins vegar við þriðja markinu á 86.mínútu og var þar að verki Alfreð Finnbogason með sitt níunda mark í sumar. Alfreð var svo nálægt því að bæta við fjórða markinu þegar hann skaut framhjá úr dauðafæri, en sigurinn var tryggður og Blikar fögnuðu vel í leikslok.



Keflavík - Breiðablik 0-1

0-1 Kristinn Steindórsson (17.mín)

0-2 Árni Kristinn Gunnarsson (62.mín)

0-3 Alfreð Finnbogason (86.mín)

Keflavíkurvöllur. Áhorfendur: 780

Dómari: Þorvaldur Árnason (7)

Skot (á mark): 8-12 (2-5)

Varin skot: Ómar 2 - Ingvar 2

Horn: 11 - 5

Aukaspyrnur fengnar: 10 – 6

Rangstöður: 3 – 7

Keflavík (4-4-2)

Ómar Jóhannsson 5

Guðjón Árni Antoníusson 3

Bjarni Hólm Aðalsteinsson 3

Haraldur Freyr Guðmundsson 4

Nicolai Jörgensen 4

Magnús Sverrir Þorsteinsson 3

Jón Gunnar Eysteinsson 6

Hólmar Örn Rúnarsson 5

Jóhann Birnir Guðmundsson 5

Magnús Þórir Matthíasson 4

(65 Bessi Víðsson 6)

Guðmundur Steinarsson 3

Breiðblik (4-5-1)

Ingvar Þór Kale 6

Árni Kristinn Gunnarsson 8

Guðmann Þórisson 7

Elfar Freyr Helgason 8 – Maður leiksins

(71 Kári Ársælsson -)

Kristinn Jónsson 8

Olgeir Sigurgeirsson 6

Guðmundur Kristjánsson 6

Finnur Orri Margeirsson 6

Arnar Grétarsson 7

(65 Alfreð Finnbogason 7)

Kristinn Steindórsson 6

(87 Andri Rafn Yeoman -)

Guðmundur Pétursson 7

Smelltu hér til að opna Boltavaktina og lesa lýsingu leiksins: Keflavík - Breiðablik

Þá er einnig hægt að nálgast Boltavaktina í Vodafone Live! farsímaþjónustunni.