Óskaði hinum eftirsótta Defour velfarnaðar í bréfi

Knattspyrnustjórinn Sir Alex Ferguson hjá Englandsmeisturum Manchester United er greinilega með alla anga úti þegar efnilegir leikmenn eru á boðstólnum en dagblaðið Het Laatste Nieuws í Belgíu birtir bréf sem hann skrifaði til hins eftirsótta Steven Defour.

Hinn 21 árs gamli Defour, sem leikur með Standard Liege, varð fyrir því óláni að fótbrotna en hann var í sumar orðaður við Manchester United, Arsenal, Liverpool, Everton og Manchester City.

Í umræddu bréfi óskar Ferguson Defour velfarnaðar út af meiðslunum og segir honum að örvænta ekki. Ferguson ráðleggur honum annars að leggja mikið á sig í endurhæfingunni því að Manchester United muni halda áfram að fylgjast með honum. Defour kveðst sjálfur vera ánægður með áhugann frá Ferguson í viðtali við Het Laatste Nieuws.

„Það er frábært að finna fyrir áhuganum en ég vill ekki að fólk haldi að ég sé þegar kominn til United. Það er líka mikilvægt að það komi fram að Ferguson sendi bréfið til Standard Liege en ekki beint til mín," segir Defour sem er samningsbundinn Standard til ársins 2013.