Hersveitir forsetans myrtu 157 mótmælendur í höfuðborginni

Hermenn, angandi af áfengi, skutu úr byssum sínum þegar þeir komu inn í Conakry, höfuðborg Vestur-Afríkuríkisins Gíneu í í gær.

Daginn áður höfðu hersveitir forseta beitt táragasi gegn mótmælendum og myrt minnst 157 þeirra. Í mótmælunum, sem stjórnvöld höfðu bannað, særðust yfir 1.200 manns. Fólkið mótmælti því að yfirmaður hersveitanna, Moussa Camara, ætlaði að bjóða sig fram til forseta.

Camara hefur verið hæstráðandi í landinu eftir að hann rændi völdum um síðustu jól og tilkynnti að stjórnarskrá ríkisins væri fallin úr gildi. Nú ríkti herstjórn.

Sjónarvottar segja að á mánudag hafi hermenn nauðgað konum úr hópi mótmælenda og svívirt þær að öðru leyti. Sjúkrahús í höfuðborginni hafi fyllst.

„Jafnvel ég, sem æðsta yfirvald ríkisins við þessar viðkvæmu aðstæður, held því ekki fram að ég geti stjórnað þessum hópum innan hersins," sagði Camara í gær.

Afríkusambandið, ESB og nágrannaríkið Senegal hafa fordæmt atburði mánudagsins.

Gínea var áður frönsk nýlenda en hlaut sjálfstæði 1958. Síðan hefur yfirstéttin rænt og ruplað samfélagið. Þessi tíu milljóna þjóð er ein sú fátækasta í heimi, þrátt fyrir miklar auðlindir sínar, svo sem demanta, gull, járn og einar mestu birgðir í heimi af báxíti og áli.