Borgarstjórn hættir ekki veiði í Elliðaám

Meirihluti Sjálfstæðis­flokks og Framsóknarflokks í borgar­stjórn vísaði frá tillögu fulltrúa Vinstri grænna um að fimm veiðidagar Reykjavíkurborgar í Elliðaánum yrðu leigðir Stangaveiðifélagi Reykjavíkur eins og aðrir veiðidagar í ánum.

Að því er fram kemur í bókun Þorleifs Gunnlaugssonar, borgarfulltrúa VG, áskilur Reykjavíkurborg, sem eigandi Elliðaánna, sér rétt til að ráðstafa veiði í ánum í fimm daga á hverju sumri. Það jafngildi sextíu veiðileyfum í ánum á besta tíma. Orkuveita Reykjavíkur hefur umsjón með Elliðaánum, sem eru leigðar út til Stangaveiðifélags Reykjavíkur. Stjórn Orkuveitunnar fyrir sitt leyti vísaði á Reykjavíkurborg þegar þar var lagt til að leggja af umrædda veiðidaga.

Meirihlutinn í borgarstjórn vísaði í samkomulag Orkuveitunnar og Stangaveiðifélags Reykjavíkur. „Borgarfulltrúum er í sjálfsvald sett hvort þeir þiggja umrætt boð um veiði í Elliðaánum. Með hliðsjón af því og þeirri umsögn sem borist hefur frá Stangaveiðifélagi Reykjavíkur er tillögunni vísað frá,“ sagði í frávísunartillögu meirihlutans sem samþykkt var með átta atkvæðum gegn sex.

Fulltrúi VG sagði frávísun meirihlutans óskiljanlega þar sem meirihluti stjórnar Orkuveitunnar hefði vísað til samnings Reykjavíkurborgar og Orkuveitunnar frá 2001 þar sem borgin áskildi sér rétt til að ráðstafa fimm veiðidögum í Elliða­ánum.

„Þarna vísar hver á annan í þeim augljósa tilgangi að þæfa málið og firra sig ábyrgð,“ segir í bókun Þorleifs, sem kveður veiðar borgarfulltrúa og embættismanna í Elliðaánum vera barn síns tíma og sjálfsagt eiga rætur að rekja til þess tíma þegar borgarfulltrúar fengu mun lægri laun en í dag.

„Nú er öldin önnur og enginn borgarfulltrúi er með laun undir 500 þúsund krónur á mánuði og ættu þeir því að geta borgað fyrir sín veiðileyfi sjálfir. Í svari Stangaveiðifélagsins segir að undanfarin ár hafi mun færri fengið en viljað veiðileyfi í ánum vegna mikillar eftirspurnar,“ bókar Þorleifur og bendir á að sala veiðileyfanna myndi færa borginni peninga á tímum mikilla fjárhagsþrenginga og niðurskurðar.

Miðað við verð Stangaveiðifélagsins á veiðileyfum til félagsmanna á besta tíma í fyrra kostuðu fimm dagar alls um 800 þúsund krónur. gar@frettabladid.is