Tugir minka dauðir úr lungnasjúkdómi

„Þetta er nú örugglega ekki tengt," segir minkabóndinn Sveinn Úlfarsson á Ingveldarstöðum í Skagafirði en 50-60 minnkar hafa drepist úr lungnasjúkdómi hjá honum. Stutt er síðan 3000 minnkar drápust á Skörðugili sem er í sömu sveit.

Alls eru 8000 minnkar á Ingveldarstöðum en að sögn Sveins varð hann fyrst var við lungnasjúkdóminn fyrir um viku síðan.

„Þannig þetta virðist vera nokkuð vægt," segir hann en þegar er byrjað að bólusetja á bænum. Það tekur svo 4-7 daga fyrir bólusetninguna að virka.

Sveinn segir að lífdýrin verði bólusett fyrst, það er læðurnar sem áttu hvolpa í vor, svo verða hinir minkarnir bólusettir í kjölfarið. Spurður hvort það sé mögulegt að jafnmörg dýr drepist og á Skörðugili svarar Sveinn: „Þetta getur farið illa. En það er ómögulegt að segja til um það núna."