Man. City óttast ekki gagnrýnendur

Stjórnarformaður Man. City, Khaldoon al-Mubarak, býst við því að félagið muni fá enn meiri gagnrýni á sig þegar félagið verður búið að ganga frá kaupunum á Joleon Lescott.

City hefur þá eytt 120 milljónum punda í leikmannakaup í sumar. City verslaði fyrir um 100 milljónir punda á síðustu leiktíð.

„Það verða alltaf til gagnrýnendur og þeim mun bara fjölga. Miðað við þann metnað sem við höfum og hvað við erum til í að leggja af mörkum til að ná árangri þá má búast við meiri gagnrýni," sagði Khaldoon.

„Það er á stundum pirrandi en þessi gagnrýni er bara þarna af því við ætlum okkur að ná árangri. Hún hefur samt ekki áhrif á neinn hérna hjá félaginu. Okkur hlakkar til að sanna að við séum að gera hlutina á réttan hátt."