Hefur áhyggjur af fjölgun barnaverndatilkynninga

Tilkynningum til barnaverndaryfirvalda hefur fjölgað mikið á milli ára. Verulegt áhyggjuefni, segir forstjóri Barnaverndarstofu.

Samkvæmt nýrri samantekt Barnaverndarstofu hefur tilkynningum til barnaverndaryfirvalda á landinu öllu fjölgað um 20 prósent fyrstu sex mánuði þessa árs, miðað við sama tímabil 2008. Var tilkynnt um tæp fjögur þúsund atvik á fyrri helmingi síðasta árs, en um 4.740 á þessu ári og hafa tilkynningar aldrei verið fleiri.

Einnig hefur fjöldi barna sem tilkynnt er um aukist verulega á milli ára, en oft eru fleiri tilkynningar en ein á bak við hvern einstakling. Sýna tölur að á fyrri hluta þessa árs eru börnin tæp fjögur þúsund, en það er fjölgun um 500 börn frá því í fyrra. Flestar tilkynningar í ár eru vegna áhættuhegðunar barna eða tæp 47 prósent, um 34 prósent vegna vanrækslu á börnum og 19 prósent vegna ofbeldis gegn börnum.

Bragi Guðbrandsson, forstjóri Barnaverndarstofu, segir þróunina verulegt áhyggjuefni, en hann telur lakari aðstæður fjölskyldna í kjölfar bankahrunsins skýra fjölgun tilkynninga að hluta. Einnig segir hann meiri meðvitund gagnvart aðstæðum barna skila sér, en mikil aukning sé á tilkynningum frá skólum og leikskólum, þar sem hegðunarvandi barna komi fyrst fram.

Athygli vekur að tilkynningum fjölgar mest í þéttbýlisstöðum, en lítið sem ekkert í dreifbýlinu. Telur Bragi það vera hugsanlega vísbendingu um að atvinnuleysi, sem sé meira í stærri byggðarkjörnum, sé að koma af meiri þunga niður á fjölskyldum þar en annars staðar.