Umboðsmaður Pogba styður málstað United

Umboðsmaður franska táningsins Paul Pogba segir að peningar hafi ekki verið aðalástæðan fyrir því að hann ákvað að fara til Manchester United.

Pogba er sautján ára gamall og yfirgaf æskufélag sitt, Le Havre, í Frakklandi, og samdi við United.

Le Havre hefur nú hótað að kæra United fyrir að hafa lokkað táninginn til sín, líkt og Lens gerði í tilfelli Chelsea og Gael Kakuta. FIFA beitti Chelsea þungri refsingu fyrir að hafa hvatt Kakuta til að rifta samningi sínum við Lens og ganga til liðs við sig.

Umboðsmaður Pogba segir að Manchester United hafi ekki gert neitt ólöglegt.

„Þetta er auðvitað góður samningur en það eru ekki bara peningar sem valda því að ungur leikmaður og foreldrar hans ákveða að flytjast úr landi," sagði Gael Mahe, umboðsmaður Pogba, í samtali við enska fjölmiðla.

Móðir Pogba sagði enn fremur að Le Havre hefði brugðist syni sínum og ekki boðið honum nýjan samning, eins og öðrum ungum leikmönnum.

„Le Havre var sama um son minn. Þegar hann missti úr skóla vegna þess að hann var að keppa var félaginu alveg sama," sagði móðirin.

Hún þvertók einnig fyrir það að foreldarnir hafi fengið hús að gjöf frá félaginu í skiptum fyrir að Pogba samdi við United. „Hótelfréttin fékk okkur til að hlægja. Við erum á hóteli og af hverju ættum við að vera hér ef við ættum hús. Ég get fullvissað þig um að félagið gaf okkur ekki neitt," sagði hún í samtali við France Football.

Umboðsmaðurinn sagði að Untited hefði sent móðurinni blómvönd, föðurnum bók um sögu Manchester United og stráknum treyju með nafni hans.